الرجوع الى صفحة التبرعات

محمد بطل 57357 يتحدى السرطان و ينتظر أخر جرعة كيماوى و أمنيته فى عيد ميلاده الشفاء و يرجع يلعب كورة تانى

محمد من أبطال 57357، عمره 14 سنة، بطل متفوق، حصل فى الشهادة الإعدادية على 97.5 %، يتحدى سرطان الدم بشجاعة، ومصمم على هزيمة المرض، علشان يحقق حلمه اللى بدأه فى أنه يكون لاعب كرة محترف.

بطلنا من القاهرة، هوايته الأولى هى لعب الكرة، ولكن أثناء لعب مباراة فى النادى، سقط على ساقه اليسرى وأصيبت، ولم تستجب لأى علاج كإصابة مباراة، وذهب لطبيب عظام، الذى أشار عليه بالتوجه لـ57357 بعد عمل أشعات وتحاليل، أظهرت إصابته بالسرطان، يقول والد محمد: “ابنى دخل 57357 فى يناير 2022، وكانت حالته وحشة جدًا، وماكانش بيمشى، ودخل على كرسى متحرك، استقبلتنا دكتورة رنا حمدى، وكلمتنى على تفاصيل حالة ابنى، وأقرت له بروتوكول العلاج بعد إعادة عمل الأشعات والتحاليل له بالمستشفى، وبدأ محمد جرعات الكيماوى، وبدأ ألم رجله يخف، وقدر يقف من تانى، ومعنوياته ارتفعت، رغم ألم جلسات الكيماوى، والحمدلله حالته بتتحسن، وهاياخد آخر جلسة كيماوى فى 7 مارس إن شاء الله، وباتمنى من قلبى إن تحاليل المتابعة تكون بخير، ويبدأ محمد مرحلة المتابعة، ادعو له هو وكل طفل بيتعالج فى 57357”.

وتصادف أن يحتفل اليوم بطلنا محمد بعيد ميلاده، وسألناه عن أمنيته، وكيف يقضى وقته فى 57357، قال: “أتمنى أخف وأرجع ألعب كورة تانى، وأحقق حلمى فى أنى أكون لاعب محترف، أنا بحب فى 57357 غرفة الألعاب، علشان بالعب فيها بلاى ستيشن وبحب الورشة، علشان بارسم وبالون فيها، والمكان هناك حلو ومريح، وعندى أصحاب كتير هناك بحبهم زى دكتور مهاب فى الداى كير، المستشفى مش بس بتعالجنى، لكنهم بيعملوا علشانى حاجات كتير،علشان يرفعوا معنوياتى”.  

 عيد ميلاد سعيد يا محمد وقريب إنشاء الله تبدأ مرحلة المتابعة وتحقق كل أحلامك  .   

  أبطال كتير فى 57357 بيتحدوا سرطان الدم بشجاعة، وصابرين على ألم العلاج، وأملهم كبير فى تحقيق الشفاء من السرطان بمساعدتكم أطفالنا الأبطال هايرجعوا لحياتهم من تانى.