ليلى: كنت بذاكر واتعالج وطلعت الأولى على مدرستى.. ادعولى ربنا يتمم شفائى

رغم تعبى بعافر وبذاكر، وإن شاء الله أحقق كل أحلامى، أنا نفسى أخف وأدخل كلية آداب قسم علم نفس، وأشتغل فى مستشفى57357 أخصائية نفسية، وأساعد أن نفسية الأطفال تكون كويسة، وفى نفس الوقت، أكون جزءًا من 57357 لأنى بحب المستشفى جدًا، وكل الناس اللى فيها.

والدة ليلى: ربنا كرمنا بـ 57357 بعد سنة بلف على دكاترة فى كل مكان فى الغربية، محدش اكتشف تعب بنتى، ولما تعبت من اللف على الدكاترة فى الغربية، جيت لدكتور فى القاهرة، طلب أشعة وتحاليل، وبعدها حولنا على 57357، وقالنا عندها سرطان فى العضم.

بفضل الله وكرمه دخلنا 57357 ، واتحجزت بسرعة، وبعد أشعة وتحاليل بدأت ليلى علاج إشعاعى وكيماوى. 

وبعد رحلة علاج طويلة، دخلنا فترة المتابعة، وبعد 5 شهور،  ليلى بدأت تتعب تانى، واكتشفنا أنها مصابة بسرطان فى الدم، ورجعت اتحجزت فى 57357 من تانى.

الحمد لله على كل شىء وإن شاء الله ليلى تخف، وترجع أحسن من الأول، أملنا فى ربنا كبير، دلوقتى احنا محجوزين فى 57357 وليلى بتاخد علاجها.

مهما نعمل مش عارفين نرد جميل 57357، لأنها سند لينا ولأولادنا، اهتمام بكل شىء، ربنا يجازيهم خير على كل اللى بيعملوه