الرجوع الى صفحة التبرعات

جراحتان بالمخ
و 30جلسة كيماوى و36 جلسة إشعاعى،لإنقاذ حياة مريم

والد مريم :
لو معايا ملايين مش هلاقى مكان أفضل من 57357 ، أعالج فيه بنتى
…

“مريم بنتي عمرها ٦ سنين، عرفت المرض قبل ما تعرف تتكلم، كان عمرها سنتين لما جالها الورم لأول مرة ،وخلال سنة ونصف أجرت جراحتين بالمخ ، وأخدت علاج كيماوى ، وكمان علاج إشعاعى ، ولسة بنتابع وبندعى ربنا يتمم شفاءها”.

ويكمل الأب بهجت إبراهيم :
“احنا من اسكندرية ، مريم هى أغلى حاجة فى حياتناظ ، طول عمرى كنت بادعى ربنا يرزقنى ببنت، وأسميها مريم، والحمد لله ربنا استجاب لدعائى، ومن يوم ما جت الدنيا بقت سر سعادة البيت كله،كانت طفلة شقية وذكية ودايما بتضحك ،وفى يوم واحد اتغيرت حياتنا كلها ، فى اليوم ده اتعرضت مريم لإغماء مفاجئ وتشنجات، وبعد الأشعة والرنين، اكتشف الدكاترة ان عندها ورم فى المخ، وقالوا لنا ان الورم بيكبر بسرعة ولازم جراحة فى أسرع وقت، وفعلا البنت خلال أيام كانت مش قادرة تمشي، ولسانها تقيل،
صدمتنا كانت كبيرة، لكن فجأة لقيت نفسي بافكر فى مستشفى 57357، كنت حاسس ان ربنا هيسخر المستشفى دى لإنقاذ بنتى ، رغم إنى ماكنتش أعرف أى حاجة عن المستشفى، حتى مكانها ، ماكنتش أعرف غير اللى بنشوفه فى الاعلانات، وكنت أحيانا مبصدقش، وبقول معقول المستشفى الجميلة دى تكون مجانى 100%..

وبسرعة ، اتصلت بالمستشفى ، وعرفنا الإجراءات، وعرضت عليهم حالة بنتى ، وخلال يومين اتصلوا بينا وقبلوا الحالة، وبمجرد دخولها عملوا كل التحاليل والفحوص والأشعات ، والدكتور محمد البلتاجى عمل لها اول جراحة لاستئصال الورم، وتمت بنجاح والحمد لله ، وبعدها اتحسنت جدا لمدة 9 شهور ، لكن للأسف رجع الورم تانى، واتعمل لها جراحة تانية، وبعدها ٣٠ جلسة كيماوى ، و ٣٦ جلسة اشعاعى..
خلصنا العلاج فى يونيو 2020، ومن وقتها بنتابع فى المستشفى، وعايشين فى رعب إن الورم يرجع تانى، لكن أملنا فى ربنا كبير ، ودايما بقول:
ربنا أرحم الرحمين، هو اللى وجهنى لمستشفى 57357 اللى أنقذت حياتها ،وبتنقذ حياة أطفال كتير غيرها ..وهو اللى هيحميها..
أنا شفت فى 57357 عدد كبير جدا من الأطفال بيتعالجوا ، وورا كل طفل أسرة كاملة اتحرمت من الفرحة..
ميعرفش مرارة التجربة وقيمة المستشفى دى ، الا الأطفال والأهالى اللى عاشوا التجربة ، ورجعت لهم الحياه بعد شفا ولادهم ..
علاج السرطان مكلّف جدا، انا عملت اشعة رنين فى مركز خاص قبل ما ندخل المستشفى اتكلفت اكتر من ألف جنيه سنة 2018،
ومن أول ما دخلنا المستشفى بنتى كانت بتاخد كل العلاج مجانى، جراحات كبيرة فى المخ، وأشعات ،وتحاليل، وكيماوى، وإشعاعى، وحتى وجبات الأكل اليومية..
الطفل من يوم دخوله المستشفى بيبقى مسئوليتهم ،دول كمان بيراعوا نفسية الطفل طول فترة علاجه، لدرجة أنهم كانوا بيسألوا مريم يوميا عن الأكل اللى تحب تاكله،علشان يفرحوها..
الأطفال هنا بيواجهوا مرض شرس وبيتألموا، ورغم كدة بتحس إنهم مرتاحين والكل بيعاملهم بمنتهى الاهتمام والرحمة.
انا لو معايا ملايين ماكنتش هلاقى مكان أفضل من كدة أعالج بنتى فيه..
وإن شاء الله ربنا هيحمى مريم وهيتمم شفاءها”.

حالة مريم تم تشخيصها
‏Choroid plexus
carcinoma
(ورم الضفيرة المشيمية)

وتكلفة علاج هذه الحالات حاليا ……..

• رحلة علاج أورام المخ طويلة وصعبة..
  وبمشاركتك فى تكلفة علاج طفل من مرضى اورام المخ ، أو بجزء من تكلفة علاجه، هتساهم فى إنقاذ حياته

” ومن أحياها فكأنما أحيا
الناس جميعا”