الرجوع الى صفحة التبرعات

سهيلة، من أسيوط، عندها 8 سنين، فى سنة تانية ابتدائى، كانت بتروح المدرسة، وبتحب المذاكرة، سهيلة، بتتعالج من سرطان الدم، وبدأت رحلة علاجها فى مستشفى57357 من 7 سنين.
وهى عمرها سنة، بدأ عليها أعراض المرض، وجاءت لمستشفى57357، وتم وضعها على قائمة الانتظار، ودخلت بعد أسبوعين علشان تبدأ مشوار علاجها فى المستشفى، وبعد 3 سنين سهيلة خفت، ورجعت تانى لحياتها، وبدأت تعمل كل الحاجات اللى بتحبها، واللى ماكنتش بتقدر تعملها وهى تعبانة، وفى مرة ظهر على جسمها طفح جلدى، والدتها توجهت لدكتور جلدية على أمل أن الموضوع بسيط، والدكتور كتب لها علاج، وللأسف أول ما أخذت أول جرعة من العلاج الطفح الجلدى زاد، وتعبت أكتر. والدتها قررت تروح تانى مستشفى57357 علشان تطمن، وفى المستشفى قالوا لها، إن سهيلة المرض رجعلها تانى، ولازم تتحجز فورًا، طبعًا الخبر مش سهل، خاصة أن دى المر ة التانية، بس سهيلة ووالدتها بفضل الله، وبدعمكم لينا وجدوا حضن كبير مفتوح ليهم طول الوقت، وباب عمره ما هيتقفل
ودلوقتى سهيلة فى وحدة زرع النخاع، علشان تعمل زرع نخاع من متبرع (أخوها)، وده علشان نزود نسبة الشفاء، ونضمن سلامتها فى مشوار العلاج، وهيفضل دايمًا الأمل موجود أن سهيلة تحقق حلمها، وتخف وتبقى دكتورة، زى الدكتورة سهام جوهر اللى بتحبها أوى من أول ما تابعت حالتها فى المستشفى، وأن كل طفل من أبطالنا ينتصروا على المرض، ويبدأوا حياة جديدة .