آسر، بطل من أبطال 57357، عنده 10 سنين، من دمياط، دخل المستشفى يوليو 2023، واتشخص بليمفوما الدم.
بدأ آسر رحلة علاجه، واتحدى كل الأوقات الصعبة والألم، و كان عنده هدف واضح، إنه يخف بسرعة، علشان يرجع لدراسته وللسباحة اللى بيحبها. في الأول كان خايف وحزين، لكن الدكتورة المسئولة عن متابعته فى 57357 شرحت له حالته وطمنته إن الأمل كبير فى الشفاء لو التزم بالعلاج مع الإيمان والارادة، وإن كل جرعة بياخدها هى خطوة تقربه من الشفاء.
مع الوقت، بدأ يشعر بالتحسن بعد كل جرعة، وبدأ الأمل، يدخل قلبه من جديد، ورجعت ضحكته الجميلة، وبقى ليه أصحاب كتير فى المستشفى، وكل مرة ييجى يقضى وقت جميل معاهم.
تحكى والدته،: آسر لما دخل 57357، كان فى حالة صعبة، ومكنتش متخيلة إنه هياخد كل الرعاية والعلاج ده بالمجان. لكن من أول يوم دخلنا المستشفى، كانت المعاملة فوق الرائعة من الأطباء والتمريض والموظفين، والاهتمام كبير بكل التفاصيل.
آسر كمان بدأ يرتاح، ورجعت ضحكته ، ويوم بعد يوم بيتحسن، لدرجة أن يوم الجرعة بقى بالنسبة له يوم سعيد لأنه بيقابل أصحابه فى المستشفى .
ولما طلبوا منه فى المدرسة، يكتب موضوع تعبير عن يوم مهم فى حياته، كتب عن أول يوم أخذ فيه العلاج الكيماوى، وقد إيه كان خايف فى الأول، لكن الدكاترة طمنوه وساعدوه، ودلوقتى بقى عنده أمل كبير فى الشفاء، وبيحلم إنه يكون دكتور فى المستقبل، علشان يعالج الأطفال، ويساعدهم .
وتضيف والدة آسر: “أنا بدعى فى الأيام المباركة دى أن ربنا يشفى ابنى، ويشفى كل الأطفال، وبقول لكل اللى بيتبرعوا لـ57357، خليكم جنب ولادنا، سند لهم، علشان بتبرعاتكم ابنى بيتعالج صح وأمله فى الشفاء بيكبر كل يوم.”
صدقتك وزكاتك سند لأطفال 57357، بتبرعك هاتساعدهم يكملوا علاجهم ويحققوا حلم الشفاء من السرطان