عاهدت نفسى ما أبخلش على المستشفى حتى لو بالقليل
“أصعب حاجة فى الدنيا أنك تحس أن ضناك هيضيع منك، ومش قادر تنقذه”، بهذه الكلمات بدأ والد سماح، يحكى رحلته مع مرض ابنته، رحلة لم يشعر بمرارتها إلا من عاشها.
“قبل دخول سماح 57357، عشنا شهورًا من العذاب، لكن الحمد لله ربنا عوضنا بالمكان ده، ومن يوم ما بنتى دخلت مستشفى 57357، واتسجلت عندهم، انزاح عننا هم المصاريف، واتكفلوا بكل علاجها مجانًا، وقدموا لها رعاية واهتمام فوق الوصف”.
ويحكى والد سماح: احنا جينا من بعيد، من قرية صغيرة، جنب مركز مطوبس بالبحيرة، جينا هنا بعد رحلة طويلة بين الدكاترة، سماح كان عمرها 4 سنين، لما بدأت تشتكى من أعراض مبتخفش، حرارة وقىء وألم فى البطن، عرضتها على دكاترة كتير، لكن الحالة كانت بتسوء، وبعد شهرين لاحظنا ظهور حَوَل واضح فى عينيها، دكتور العيون طلب رنين على المخ، وفوجئنا بالنتيجة، ورم فى المخ، وتجمع مياه ضاغط على عصب العين، والحل الوحيد، تركيب صمام بالمخ فورًا لشفط الماء، وإنقاذ العين من العمى.
مصاريف وديون
“مفيش أغلى من الضنا”، بهذه العبارة وصف الأب إحساسه عندما علم أن العملية تتكلف 100 ألف جنيه، مبلغ لا يملك منه شيئًا، لكن حياة سماح غالية، لجأ الأب لكل من يعرفهم، استدان من الأقارب والجيران والمعارف، وتمكن أخيرًا من إجراء العملية، وتركيب الصمام لسماح.
ويكمل الأب:
“فرحتنا ما كملتش، لأننا اكتشفنا أن تركيب الصمام بداية رحلة علاج طويلة، وأن سماح ممكن تحتاج جراحة، وجلسات كيماوى وإشعاعى، الصدمة كانت فوق الوصف، لأننا ما نملكش تمن جلسة واحدة، والديون تراكمت، ومفيش حد تانى ممكن نستلف منه”.
نور وسط الظلام
“زى ما بيقولوا، وسط الضلمة ربنا بيبعت النور، فوجئت باتصال من صديق بيطمن على سماح، ولما عرف أن عندها ورم، سألنى، ليه مارحتش 57357، قلت له دى مستشفى كبيرة، وأكيد محتاجة واسطة، قال لى دى مستشفى مجانى، مفيهاش واسطة، وعالجت أطفال كتير، اتوكل على الله، وروح وجرب.. وفعلًا، خرجنا من بيتنا فى نفس الليلة، ووصلنا المستشفى 7 الصبح، كشفوا عليها، وشافوا الأوراق، وأخذنا رقم، وخلال فترة قصيرة دخلت سماح المستشفى، وبدأوا فورًا مجموعة كبيرة من التحاليل والفحوصات والأشعات، والمتابعة المستمرة لحالة الورم، من يوم ما دخلنا 57357، انزاح عننا هم المصاريف، واتكفلوا بكل حاجة، مش بس العلاج، لكن رعاية واهتمام فوق الوصف”.
ويقول د. أسامة الرفاعى، المسئول عن متابعة حالة سماح: تشخيص حالة سماح، ورم فى المخ BSG
Brainstem glioma، وقد تم أخذ عينة من الورم لتحليلها، وكذلك تحليل دلالات أورام، وبعد النتيجة سيتم تحديد البروتوكول العلاجى.
يؤكد الأب: “احنا فى انتظار النتيجة، وكلنا ثقة فى الله، وفى المستشفى، وفى كل العاملين فيها، احنا عارفين أن رحلة العلاج طويلة، لكن أملنا كبير فى الشفا، وربنا يقدر المستشفى على المسئولية الكبيرة اللى شيلاها”.
“رد الجميل”
ويضيف الأب:
“57357 أكرمت بنتى، وشالت عننا حمل كبير، وأنا كمان قررت مبخلش عليها بأى حاجة مهما كانت قليلة، صحيح أنا عامل محارة، ورزقى على الله، لكن عاهدت نفسى أن أى فلوس أكسبها أتبرع بجزء منها للمستشفى مهما كان قليل
وربنا يقدرنى على رد الجميل”.