” أوجينيا”، بطلة من أبطال مستشفى 57357، عندها 9 سنين من الخصوص في القليوبية،دخلت 57357 في يوليو 2024، تم تشخيصها بسرطان في الغدد الليمفاوية، وبدأت رحلة العلاج الكيميائي في المستشفى،وبعد 6 شهور من العلاج، أظهرت التحاليل استجابة ممتازة، وقررت الدكتورة مرام، الاستشاري المعالج لها، أنها تبدأ مرحلة المتابعة الشهرية لمدة 6 شهور، ثم تستمر المتابعة بوجه عام لمدة خمس سنين.
“أوجينيا”، حكت عن حبها الكبير لفرق التمريض والمتطوعين في المستشفى، وقالت: “أنا بحب كل اللي في 57357، خصوصًا التمريض مستر كريم، ومستر أمير، وميس نجلاء، لأنهم دايمًا معايا وبيحبوني وبيخلوني ألعب، ودكتورة مرام دي حبيبتي وصاحبتى وزيارات المتطوعين كانت بتخفف عني وقت الوجع، خاصة لما كنت باخد الجرعة، وآخرمرة كنت في المستشفى قبل العيد، كان فيه زيارة من كنيسة من الشرقية، لعبوا معايا وفرحوني، ورسمنا سوا، وخلوا يومي حلو قوي”.
ولما سألناها عن أمنيتها في السنة الجديدة، قالت أوجينيا: “اتمنيت من ربنا إن العيد يجي، وأنا مش عيانة، والحمد لله، ربنا استجاب لي، وكنت كويسة، وقضيت العيد في بيتنا، والدكتورة قالت لي إني بقيت تمام، وهابدأ مرحلة المتابعة”.وأضافت: “أمنيتي التانية لما أكبر إني أكون رسامة”.
أما والدة أوجينيا، فقالت: “مستشفى 57357 دي جنة، ما كنتش متخيلة إن كل حاجة بنشوفها في الإعلانات دي حقيقية.. كنت خايفة أول ما دخلنا المستشفى، لكن الدكتورة مرام،كانت دايمًا بتطمني، وبتديني أمل أن بنتي هاتخف إن شاء الله، فى الحقيقة المعاملة الطيبة من كل الناس في المستشفى خففت عني كتير في رحلة علاج بنتي”، وأضافت: “أنا بشكر كل الناس اللي بتتبرع لمستشفى 57357، لأنهم السبب في أني لقيت مكان زى دا أعالج فيه بنتي وأنا مطمئنة، الحمد لله على كل اللي عملوه لبنتي”.
نتمنى لأوجينيا سنة جديدة سعيدة كلها صحة وفرح، ولجميع أطفال مستشفى 57357، سنة كلها أمل وشفاء.