“ملك”، عمرها 7 سنوات، بدأت علاجها من سرطان الدم فى 2017، لما كان عمرها سنة ونص.
تقول والدة “ملك”: “فترة العلاج استمرت 3 سنين، كانت فترة صعبة علينا، بس ربنا كرمنا بمستشفى57357، كأنها طوق نجاة لبنتى، ولكل طفل محتاج لها.. ومش عارفة من غيرها كنا هنروح فين ونعمل إيه.
بشكر د. عماد موسى، لأنه كان أب لبنتى قبل ما يكون الدكتور اللى بيعالجها، ربنا يجازيه، ويجازى كل العاملين والمتبرعين والمتطوعين خيرًا على مجهودهم معانا، دلوقتى الحمد لله.
“ملك” بتحب المستشفى، لدرجة أن نفسها تطلع دكتورة وتشتغل فيها، وده مش غريب لأن 57357 هى المكان اللى ملك وأطفال كتير اتولدوا فيه من جديد، وشافوا فيه حب واهتمام من كل العاملين والمتطوعين.
“ملك” دلوقتى فى فترة متابعة، بقالها ٣ سنين، والحمد لله، رجعت لحياتها وأصحابها وهواياتها، وحصلت على ميدالية ذهبية فى بطولة الجمهورية للجمباز تحت سن 7 سنين.
بدعى ربنا يحفظها، ويشفى كل مريض، وتفضل مستشفى 57357 مفتوحة لكل طفل محتاج لها.