16 عاما على افتتاح بيتنا الكبير 57357، العلم والجودة والإخلاص سر النجاح، وكل طفل بيخف بنعتبره يوم عيد

النهاردة بنحتفل بعيد ميلاد بيتنا الكبير 57357
البيت اللى بنيناه بالجهد والتعب والإصرار 
-زى النهاردة من 16 سنة افتتحنا مستشفى 57357، اللى كانت نقلة حقيقية فى مجال علاج سرطان الأطفال،-الصرح ده كان وراه رحلة كفاح وإخلاص وجهد عمرها اكثر من 30 سنة ، 
-قبل الصرح ده كان الأطفال مرضى السرطان ، بيعانوا من نقص الامكانيات والأجهزة والأماكن ، وفى الوقت ده ظهر ت الفكرة من المؤسسين اللى حلموا، و آمنوا بالحلم ، وساندوه بجهدهم وإصرارهم وعلمهم..
-من أول يوم كان حلمهم وطموحهم كبير “طفولة بلا سرطان” ، و من أول يوم كانت مبادئهم ، العلم والجودة والإخلاص والعدالة. 
-من يوم ما بدأنا ، بنهتم بالتعليم المستمر والبحث العلمى، وبنوفر أحدث الأجهزة والتقنيات العلاجية،وبنعمل شراكات وبروتوكولات تعاون مع اكبر الجامعات والمراكز العالمية  ، والعالم كله اعترف بمكانتنا الدولية وبقينا مركز معتمد للتدريب العملى لبرامج دولية كبيرة فى مكافحة العدوى والصيدلة الاكلينيكية والتمريض وغيرها.
-احنا كمان السنة دى  فتحنا وحدة السايبر نايف اللى بتعتبر طفرة فى العلاج الإشعاعى ، وبنستعد لفتح مبنى البروتون ثيرابى ، وبنجهز لتوسعة وحدة زرع النخاع اللى هيساهم فى إنقاذ عدد أكبر من مرضى الحالات الخطيرة والمرتدة. 
– عندنا كمان تطوير مستمر للأقسام ، وتحديث مستمر للأجهزة والمعامل والغرف ، وتكاليف الإقامة الكاملة والتغذية الصحية للأطفال، عندنا كمان بحث علمى ، وأبحاث بتتنشر فى أكبر المجلات العلمية العالمية، أنقذنا حالات خطيرة، وعملنا جراحات دقيقة ونادرة، وكمان بنعلّم ونخرّج كوادر صحية جديدة ..
-النهاردة بنحتفل بعيد ميلاد بيتنا الكبير  57357
-لكن كل يوم بيخف طفل جديد، بنعتبره يوم عيد،
ولسة بنحلم لكل الأطفال بالعلاج والشفا 
-ومش هنبطل نحلم لولادنا ..
– صحيح العبء كبير ، وتكاليف العلاج ضخمة 
لكن احنا متمسكين بالجودة والتميز ، والتطوير  المستمر، و عندنا دايما إنجازات جديدة،لأن ولادنا يستاهلوا أفضل رعاية، 
-وفى عيد ميلاد 57357، بنشكر كل اللى ساندونا ولسة واقفين ورانا  بنشكركم على ثقتكم فينا ووقفتكم جنب ولادنا ، وحرصكم على دعمهم فى أصعب الظروف .