فى مستشفى 57357 أبطال كتير دعمك بيقويهم، ويساعدهم يتحدوا السرطان وينتصروا عليه، بطلنا زكريا، 8 سنوات، من المحلة الكبرى، اتحدى السرطان من عمر 11 شهر رحلة علاج طويلة كلها صبر وأمل، انتصر فيها زكريا على سرطان العين، ورغم أنه أصبح يرى بقلبه لم يتوقف عن التمسك بالأمل وحب الحياة، فهو شاطر جدًا فى مدرسته، هو فى الصف الثانى أزهرى،وأتم حفظ القرآن الكريم، ويحب قراءة القرآن،وبيتمنى يصبح قارئ شهير للقرآن الكريم يعرفه الناس فى كل مكان، ولقد حباه الله بصوت عذب ما أن تسمعه يتلو القرآن أو يقول ابتهالات حتى يدخل قلبك.
تقول والدة زكريا:
لما عرفت أن زكريا عنده ورم فى العين وهو عنده 11 شهر جيرانى قالوا لى روحى فورًا على 57357 هايعالجوه إن شاء الله ، كنت خايفة ما يقبلونيش، لكن قدمت الورق كله وقبلونا والحمد لله ولا فيه واسطة ولا أى حاجة، وقابلنا الدكتور حسام واتكلم معايا وشرح لى حالة ابنى بالظبط، وكلامه خفف عليا كتير، وساعدنى أتقبل الموضوع، لقيت معاملة واهتمام ورعاية كبيرة لابنى ماكانش ممكن ألاقيها فى أى مكان تانى وكمان بالمجان،
المستشفى أنقذت حياة زكريا من انتشار السرطان اللى كان هيقضى على حياته، صحيح هو استأصل عينيه الاتنين لكن أنا مؤمنة بربنا أن دا قدره وعلشان ننقذه كان لازم يحصل كدا،دلوقتى زكريا فى مدرسته شاطر وحفظ القرآن الكريم كله وبيحب تلاوته جدًا.
زكريا هو ابنى الوحيد ولولا ٥٧ و الناس اللى بتتبرع كنت هاعمل إيه ،الناس فى بلدنا لما شافوا زكريا صحته اتحسنت بقوا يتبرعوا للمستشفى، وأنا دايما أقول لكل اللى أعرفهم اللى يقدر يتبرع ما يتأخرش، وأنا باتبرع باللى أقدر عليه علشان ابنى واللى زيه يتعالجوا أحسن علاج، وباقول لكل الناس المستشفى دى رحمة كبيرة لينا ولولادنا ساعدوهم علشان يعالجوا كل الأطفال اللى فيها ومحدش يحزن على ضناه أبدًا يارب.
زكريا: أنا بحب أقرأ القرآن الكريم وحافظه كله وكمان باصوم رمضان من الصبح للمغرب بقى لى سنتين، عندى أصحاب كتير فى المستشفى، وباقول يارب يشفيهم، أنا بحب ميس دعاء قوى ودكتور أسامة علشان بيضحكوا معايا كل لما باروح وبيسألوا عليا كمان فى التليفون، باتمنى لما أكبر أبقى قارئ للقرآن مشهور وكل الناس عارفانى، أنا فى رمضان دايمًا باقول الدعاء اللى بعد التراويح فى المسجد ودخلت مسابقات كتير للابتهالات وحفظت القرآن وكسبت، يارب يخلى 57357 وأصحابى ويحفظ الناس كلها اللى بتتبرع علشانا.
أطفال 57357 ولادكم بدعمكم بيتكتب لهم بإذن ربنا النجاة من السرطان وبترجع البسمة على وشوش أسرهم..خليك جنبهم إيدك فى إيدينا نوصلهم لبر الأمان ونحقق لهم حلم الشفاء بإذن الله.
