أطفالنا فى 57357 أبطال بيعيشوا رحلة علاجهم بكل تفاصيلها و بيتحدوا الألم , جاسمين 5 سنوات بتتحدى ورم فى البطن دخلت 57357 فى فبراير 2020 و بدأت رحلة علاجها بجرعات كيماوى و بفضل الله بدأت فى التحسن ، و مصممة تكمل مشوارها و تنتصر على السرطان , و فى كل مكان فى المستشفى لها أصدقاء و بتحب جداً تمريض الدور الثالث اصحابها اللى أهدوها سماعة طبيب و بالطو تشجيعاً لها على تحقيق حلمها فى أن تكون دكتورة فى 57357 .
تقول والدتها : جاسمين كانت درجة حرارتها مرتفعة جدا ولا تستجيب لأى أدوية و أشار علينا أحد الأطباء بعد عمل اشعات و تحاليل التوجه فوراً ل57357 , كنت فى حالة انهيار و خوف من عدم قبول بنتى، هالاقى فين مكان متخصص يعالجها زى هنا ؟ كنت منهارة لكن قابلنا الاستشارى د.ياسر يوسف ربنا يبارك له انسان قبل ما يكون دكتور كلمنا بمنتهى الهدوء عن حالتها و فهمنا كل حاجة و قالنا الأمل فى ربنا كبيران شاء الله خير هيا هاتاخد جرعات كيماوى و هانتابع حالتها و ان شاء الله تتحسن .
و عن رحلة علاجها تقول والدتها : فى البداية كنت خايفة و لكن اتفاجئت بالمعاملة والاهتمام و دائما بيكون حد من التمريض معانا يفهمنا، و الدكاترة اهتمامهم غير عادى ببنتى و كأنها هيا بس اللى بتتعالج و اكتشفت انهم بيعملوا كدة مع كل الأطفال كل دا خفف عليا و على بنتى كتير و، ورغم وجع الكيماوى جاسمين كانت بتضحك و بتلون و ترسم , و حالتها بتتحسن الحمدلله و بقت تحب المستشفى جداً و بتستنى اليوم اللى تيجى فيه علشان تشوف اصحابها الدكاترة و الموظفين و تمريض الدور الثالث انا كمان بحب المستشفى جدا خففوا عليا حزنى على تعب بنتى دا غير الاهتمام و الرعاية و المتابعة المستمرة اللى بتطمن قلبى عليها كل يوم أكتر .
رسالة من أم جاسمين :
57357 منحونا الأمل فى شفاء ياسمين ،و باقول لكل الناس اللى بتتبرع للمستشفى شكراً علشان تبرعكم أعطى لبنتى فرصة تانية فى الحياة بفضل ربنا, خليكم واقفين مع المستشفى دى مركب الأمان اللى شايلة عيالنا و هاتوصلهم للشفاء بإذن الله و من غيرها كنا هانعالجهم فين و ازاى , ربنا يحفظ 57357 و يبارك فى كل اللى بيشتغلوا فيها و كل اللى واقفين جنبها .
جاسمين لسه بتكمل مشوار علاجها و بدعمكم هاتنتصر على السرطان و نحتفل بشفائها و كل أطفالنا فى 57357 بإذن الله
مستشفى 57357 رحلة علم …هدفها الحياة
