بهجة العيد أكيد هتكمل وتزيد، لو قدرنا نساهم فى رحلة الشفاء لطفل مريض، تعالوا نقف جنب ولادنا فى رحلة الشفاء، ونساعدهم يفرحوا بالعيد زى كل الأطفال.
ولادنا أمانة، واحنا متمسكين بالرسالة اللى ربنا كلفنا بيها، ورغم أن العبء كبير، وتكاليف العلاج ضخمة، هنفضل متمسكين بالجودة والتميز، وبفضل الله ودعمكم بنحقق كل يوم انجازات جديدة.
حدثنا الأجهزة، وفتحنا وحدة السايبر نايف اللى بتعتبر طفرة فى العلاج الإشعاعى
وبنستعد لتطوير قسم الطوارئ اللى بيستقبل شهريا أكثر من 2000 طفل من الحالات الحرجة، وبنوسع وحدة زرع النخاع اللى هتنقذ عدد أكبر من مرضى الحالات الخطيرة والمرتدة.
وعندنا كمان تطوير مستمر للأقسام، وتحديث مستمر للأجهزة والمعامل والغرف، وأبحاث علمية بتتنشر فى أكبر المجلات العلمية العالمية.
أنقذنا حالات خطيرة، وعملنا جراحات دقيقة ونادرة، وكمان بنعلّم ونخرّج كوادر صحية جديدة، وبندرّب أطباء وصيادلة وتمريض، من مصر وخارج مصر، وبننقل لهم خبرتنا. وحصلنا على اعتمادات عالمية ومحلية تؤكد التزامنا بأعلى معايير الجودة
ومش هنبطل نحلم لولادنا..
وقفتك معانا، هى اللى بتساعدنا نُوفر تكاليف فترة العلاج الطويلة، وتكاليف التشغيل اليومى وتحديث الأجهزة وصيانتها الدورية، ومستلزمات المعامل، وغيرها الكثير.
وبابنا دايمًا مفتوح لكل اللى عايز يزور.. ويشوف.. ويسأل ويتابع.. علشان يعرف تبرعاته بتروح فين وعملنا بيها إيه.
شكرا على ثقتك فينا ووقفتك جنب ولادنا.
وحرصك على دعمك لنا فى أصعب الظروف.
كل سنة وأنت بتشاركنا نسعد طفل جديد ونخفف آلامه.