شهادات طلاب الدفعة الأولى: تعلمنا واستمتعنا بالتجارب العملية والمحاضرات .. وانبهرنا بإمكانيات الأجهزة والمعامل فى 57357
احتفل مستشفى 57357 بتخريج الدفعة الأولى من من طلاب برنامج نادى علماء المستقبل، وهو برنامج علمى مميز وممتع، يتم تنظيمه دوريا، ويهدف لتعزيز ثقافة البحث العلمى بين الطلاب
من سن 10-17 .
يتناول البرنامج على مدار خمسة أيام، العديد من الأنشطة التى تناسب جميع الميول والاهتمامات العلمية، لمساعدة أبنائنا على اكتشاف مهاراتهم،
وتحديد مسارهم المستقبلى.
وتضم أنشطة البرنامج محاضرات علمية مبسطة وإجراء تجارب تطبيقية وممارسة أنشطة ترفيهية،
ويتعرف الطلاب من خلال البرنامج على مبادئ الذكاء الاصطناعى وعلوم الجينات والخلايا والصيدلة.
كما يكتسب الطلاب معلومات فى مجال الهندسة الطبية من خلال التعرف على الأجهزة الطبية وكيفية عملها.
يهدف البرنامج أيضا لتنمية التفكير العلمى من خلال تنمية المهارات الذاتية مثل فن إدارة الوقت، والمهارات القيادية، والعمل داخل فريق ناجح، بالإضافة إلى تعلم القيم الإنسانية، مثل العطاء، واحترام الآخر، كما يتخلل البرنامج بعض الأنشطة الترفيهية على مدار اليوم.
وفى نهاية البرنامج، يتسلم الطلاب شهادات باجتياز فعاليات البرنامج ضمن احتفاليه يحضرها أهالى الطلاب.
تعلم.. ومتعة.. وإبها
سليم إسلام: طول عمرى باحب المواد العلمية، وكان نفسى أشوف معمل مجهز وأعمل تجارب بإيدى.. واتحقق حلمى هنا فى 57357
فخلال فترة البرنامج، دخلنا معامل مبهرة، وطبقنا تجارب كتيرة، وكان بيشرف علينا باحثون وعلماء كبار، بيوجهونا ويشرحوا لنا بشكل مبسط، واتعلمنا منهم كتير طول فترة البرنامج.
جمانة خالد 16 سنة: البرنامج ده، ساعدنى أنا وزمايلى نختار مجال دراستنا، لأننا اكتشفنا أن المجال العلمى مبهر وممتع، وخاصة لما طبقنا تجارب عملية، وعملنا منتجات بإيدينا زى المطهرات والكريمات والسبراى، وغيرها، وأخدنا محاضرات عن البكتريا والخلايا، وفصلنا ال DNA و RNA وعرفنا الفرق بينهم، ودرسنا كمان معلومات مبسطة عن الأدوية، وتركيزاتها وإزاى بتأثر على جسم الإنسان.
أحمد وسام 15 سنة:
أنا أكثر حاجة كنت بستمتع بها هى لعب تنس وبس، وكنت فاكر أن نادى علماء المستقبل هيكون حاجة مملة، لكن اكتشفت العكس، أنا قضيت أسبوعا ممتعا، كأنى سافرت رحلة ممتعة فى مكان مختلف، استمتعت بمحاضرات علمية بإشراف دكاترة كبار، واستمتعت كمان بمحاضرات تنمية بشرية وأنشطة ترفيهية، كنت بحكى لأصحابى كل يوم عن الحاجات الجديدة اللى اتعلمتها، وكتير منهم هييجوا يشتركوا.
كرمة عمرو: الدكاترة اللى درسوا لنا فى البرنامج، خلونا نحب المواد العلمية، وعلمونا حاجات تانية كتير، تساعدنا فى تطوير أفكارنا وشخصياتنا، وتحديد مستقبلنا .
وأكتر حاجة انبهرت بها، الأجهزة الحديثة اللى موجودة فى المستشفى، وخاصة جهاز السايبر نايف، اللى عرفنا من الدكاترة أنه تكنولوجيا حديثة جدا، بتعالج الورم من غير أى ضرر للأنسجة اللى جنبه، وكنت أنا وزمايلى فخورين أن الجهاز المتطور ده، موجود فى 57357 .
يوسف خالد حسن 14 سنة: أنا بحب الحاجات العلمية جدا، وكنت مبهور وأنا بتعرف على الخلايا والبكتريا والجينات على الطبيعة، وأجمل حاجة أن جدول البرنامج مش بس مواد علمية، لكن كان فيه محاضرات بتعلمنا إزاى نطور مهاراتنا، وإزاى نفكر تفكير صحيح، وناخد قرارات صح فى حياتنا .
محمد محمود الشوبكى 12 سنة: أنا كنت مبهور بالأجهزة والمعامل، وفرحت جدا أن عندنا فى مصر تقدم علمى كبير كدة، ومن أكثر الحاجات اللى حبيتها أنى عملت أصحاب فى البرنامج، واتعلمت الشغل الجماعى وكونا فريق علمى بنشتغل مع بعض ونعمل تجارب عملية مع بعض، وبصراحة حبيت المجال العلمى جدا بعد البرنامج ده.
