فريدة بدأت علاجها وعمرها 3 شهور وربنا كتب لها الشفاء فى 57357 فريدة الآن 4 سنوات ، وتعيش حياتها مثل كل الأطفال

والد فريدة : بنتي بدأت علاجها في 57357 وعمرها 3 شهور ، المستشفى كانت طوق نجاة مكنتش هعرف اعمل ايه لو مفيش 57357، .. فريدة اتولدت فى بداية 2019 اخدت تطعيماتها وكان في انتفاخ كبير في بطنها، رحنا للدكتور وحولنا علي مستشفى الملكة ناظلي في اسكندرية، الدكتور كتب لها علي أدوية لكن مفيش تحسن، وبعد تحاليل وفحوصات اكتشفنا ان عندها سرطان في الدم، الدكتور حولنا على 57357 ، كنت خايف يكون فيه واسطة علشان فيه ناس قالت كدة ، وكنت خايف تكون اعلانات المستشفى غير الحقيقة، لكن قلت هحاول وفعلا اخذت فريدة و دخلنا العيادات الخارجية، وبعد الكشف، فريدة اخذت رقم فى قايمة الإنتظار فى 57357 ، مشيت وانا خايف متتقبلش، لكن بعد كام يوم كلمونا واستقبلنا د أحمد عماد اللى تابع حالة فريدة، وبدأنا العلاج ، الحقيقة شفنا رعاية مش موجودة واهتمام من الجميع وكأن 57357 طوق نجاة ، حسيت قد ايه كنت ظالم مستشفي 57357 وبقول دول بتوع اعلانات وخلاص..فريدة كانت حالتها صعبة دخلت الرعاية فترة كبيرة ، كنت بقول لوالدتها مفيش أمل، لكن الحمد لله ربنا كرمنا بفضل دكاترة وتمريض 57357 وكل المتبرعين ، دلوقتي فريدة عندها 4 سنين صحتها احسن وبنيجي متابعة كل شهرين.