الرجوع الى صفحة التبرعات

حمزة بطل 57357 انتصر على السرطان وبيتمنى يطلع ظابط 

حمزة، عنده 9 سنين، من القاهرة دخل 57357 فى يناير 2021، تم تشخيصه بورم فى عضلات العين. 

عمل جراحة استئصال للورم، وبعدها خضع للعلاج الكيماوى، رحلة علاجه استمرت حتى نوفمبر 2022 بعدها قرر له الطبيب المعالج بدء مرحلة المتابعة كل 3 شهور والآن يقوم بالمتابعة كل 6 شهور. 

وعن بداية تعب حمزة، تقول والدته: أنا لاحظت ورم حوالين عينه شكله غريب، ولما عرضته على دكتور رمد وبعد الأشعات و التحاليل نصحنى بالتوجه فورًا لـ57357، كانت صدمة بالنسبة لى خاصة أنى لما رحت أقدم ورق حمزة دخل فى نفس اليوم، وبعدها دخل بسرعة جراحة، لأن الدكتور المعالج، قالى إن الورم، كان قريب جدًا من الوصول للمخ، رغم صدمتى فى مرض حمزة، لكن بدخول المستشفى واهتمامهم بسرعة عمل العملية والعلاج و الرعاية، طمنوا قلبى على ابنى، وحتى لو اشتكى من تعب فى أى حاجة تانى فى جسمه بروح به على طول بيعالجوه وكل دا مجانًا.  

فعلا أنا شوفت إنسانية فى التعامل فى 57357 خففت عليا كتير قوى من زعلى على ابنى وطمنتنى، دلوقتى بعد ما ربنا كرمنا وبقى كويس، أنا باشجع كل الناس تتبرع لمستشفى 57357، ربنا يجازى خير كل الناس اللى بتشتغل فى المستشفى على تعبهم مع ولادنا .

وبالحديث مع حمزة عن أمنيته فى بداية العام الجديد، قال: “نفسى أبقى كويس كدا على طول وما ارجعش أتعب تانى أبدًا لأن عندى حلم ونفسى أحققه باتمنى لما أكبر أطلع ظابط”. 

تبرعك ساعد حمزة يكمل مشوار علاجه، وينتصر بفضل ربنا على السرطان، كمل معانا مشوار الخير علشان أطفال تانية كتير فى 57357  زى حمزة يكملوا علاجهم ويحققوا حلم الشفاء بإذن الله.​