الرجوع الى صفحة التبرعات

-“ردينة” تبرعت بالنخاع لإنقاذ حياة أختها

-الأم :

حسيت إن ولادى “فى إيد أمينة” ، بفضل الله وكفاءة 57357

-ربنا أكرمنا بالشفا، وأطفال كتير ، فى انتظار توسعة وحدة زرع النخاع

…..

-لما الدكاترة قالولى ان بنتى ردينة (9 سنين)، هى الوحيدة اللى ممكن تتبرع بالنخاع لأختها “مكة” (سنتين) ، كنت مرعوبة عليهم هما الاتنين، كنت أتمنى إنى أنا اللى أتبرع لبنتى ، لكن ربنا أراد ان توافق النخاع بنسبة 100% يكون بين “ردينة” و “مكة” بس.

• اترددت فى الأول ، لكن إيمانى بربنا، وثقتى فى دكاترة 57357، وفى مستوى وامكانيات المستشفى، شجعنى أوافق ، والحمد لله عملية الزرع نجحت وولادى الاتنين بخير.

-وتكمل الأم: “مكة” معرفتش الضحك من يوم ما اتولدت، المرض هاجمها وعمرها 4 شهور، لاحظت فجأة ان نموها بيقل جدا، وجسمها لونه أصفر، وحراراتها عالية باستمرار، عملنا لها صورة دم واكتشفنا ان الصفايح وكرات الدم منخفضة، الدكتور طلب نعمل بزل ، وبعدها قال لنا ان مكة عندها لوكيميا ، ونصحنا ما نديهاش أى علاج ، و نروح بيها فورا مستشفى 57357.

-فى المستشفى عرفنا ان حالة “مكة” صعبة ، وإنها محتاجة كيماوى ، وبعده لازم نزرع نخاع ، علشان نرفع نسب الشفا، وفعلا بدأوا معها فورا علاج كيماوى مكثف، وبدأوا يجهزوها لزرع النخاع ، واكتشفنا إن أطفال كتير محتاجين زرع النخاع ، وإنها لازم تستنى دورها، وإن المستشفى بتعمل توسعات فى الوحدة علشان يقدروا يزودوا السراير ، ويقللوا قايمة الانتظار .

-كان نفسي أقول لكل الناس تتبرع، وفعلا بدأت أكتب على الفيسبوك ، وأطلب من الناس تتبرع لتوسعة الوحدة، علشان ينقذوا بنتى “مكة”، واللى زيها.

-والحمد لله “مكة” زرعت من 3 شهور من أختها “ردينة” المتطابقة معاها ، و”ردينة” كانت عارفة انها هتتبرع لأختها ، ورغم خوفها من الحقن، كانت موافقة ، و نفسها تنقذ أختها ، وبعد نجاح التبرع، “ردينة” كانت مبسوطة جدا ، وحكت لكل أصحابها وجيراننا وقرايبنا ، لدرجة إن أخوها الصغير كان نفسه هو كمان يتبرع زيها.

• أنا باحمد ربنا كل لحظة ، وبادعى إن ربنا يوفق المستشفى ،والتبرعات تزيد ويقدروا يوسعوا وحدة زرع النخاع بسرعة علشان ينقذوا حياة كل الأطفال اللى محتاجة العلاج ده.